இதில் 13-வது வார்டு பகுதி கவுன்சிலர் பாட்டாளி மக்கள் கட்சி உறுப்பினருமான வெங்கடாசலபதி பேசும்பொழுது, மக்கள் நலத்திட்ட பணிகள் முறையாக எதுவும் நடைபெறுவதில்லை எனவும், ஒரு வளர்ச்சி பணிகள் கூட மேற்கொள்ளப்படவில்லை என குற்றம் சாட்டினார்.
மேலும், அந்தப் பகுதியில் அமைக்கப்பட்டுள்ள தார் சாலை மூன்றே நாட்களில் பெயர்ந்து கைகளில் வரும் அளவு தரம் குறைவாக போடப்பட்டுள்ளது. இது தொடர்பாக எந்த நடவடிக்கையும் மேற்கொள்வதில்லை எனவும் உரிய முறையில் டெண்டர் விடாமல் ஒரு தலைப்பட்சமாக பேரூராட்சி தலைவர் செயல்படுவதாகவும் கடுமையாக குற்றம் சாட்டி பேசினார்.
அதேபோல பேரூராட்சியில் ஊழல் தலைவிரித்து ஆடுவதாகவும், எதற்கு எடுத்தாலும் லஞ்சம் என்ற சூழல் இருப்பதால் மக்கள் நல பணிகள் எதுவும் நடைபெறாமல் முடங்கி கிடப்பதுடன் வாக்களித்த மக்களிடம் நேரில் சென்று சந்திக்க இயலாத சூழ்நிலை உருவாகியுள்ளதாகவும் பேசினார்.
இதனைத் தொடர்ந்து 5-வது வார்டு கவுன்சிலர் திமுகவைச் சேர்ந்த விஜயஸ்ரீ பேசும்பொழுது கெலமங்கலம் பேருந்து நிலையத்தையொட்டி தற்போது அதிக எண்ணிக்கையில் இறைச்சி மட்டன் கடைகள் செயல்பட்டு வருவதால், அங்கிருந்து வெளியேற்றப்படும் இறைச்சி கழிவுகளை தின்பதற்கு அங்கு ஏராளமான தெரு நாய்கள் கூடுவதால் பொதுமக்களுக்கு சிரமம் ஏற்படுவதுடன் விபத்துக்கள் ஏற்படும் அபாயமும் நிலவுகிறது.
மேலும் இந்த இறைச்சி கழிவுகளை அருகிலுள்ள நீர் நிலைகளில் வீசிவிட்டுச் செல்வதால் சுகாதார சீர்கேடுகளும் ஏற்பட்டு பொதுமக்கள் மட்டுமல்லாது கால்நடைகளும் பாதிப்புக்கு உள்ளாகின்றன என குற்றம் சாட்டி பேசினார். இதுபோன்று பல விஷயங்களை முன்வைத்து பேசினார்கள் கவுன்சிலர்கள், கெலமங்கலம் தேர்வு நிலை பேரூராட்சி சாதாரண மன்றக் கூட்டத்தில், என்னதான் கவுன்சிலர்கள் சாதாரண மன்ற கூட்டத்தில் பேசி கத்தினாலும் வாக்களித்த மக்களுக்கு எந்த ஒரு அடிப்படை வசதிகளும் செய்யப்படாமல் தான் உள்ளதாக சமூக ஆர்வலர்கள் வேதனை தெரிவிக்கின்றனர்.
No comments:
Post a Comment