அமைச்சரின் வீட்டின் முன் அடித்துக் கொண்ட ஒன்றிய பெருந்தலைவர் மற்றும் திமுக ஒன்றிய செயலாளர்!நடவடிக்கை எடுக்காத அமைச்சர் துரைமுருகன்!

வேலூர் மாவட்டம், காட்பாடி 

பொருட்காட்சி திறப்பு விழாவில் கலந்து கொள்ள காட்பாடி இல்லத்திற்கு வருகை தந்த தமிழ்நாடு நீர்ப்பாசனம் மற்றும் கனிமவளத் துறை அமைச்சரும், திமுக பொதுச் செயலாளருமான துரைமுருகன் இல்லத்தின் முன்பு கடுமையாக மோதிக்கொண்ட ஒன்றிய குழு பெருந்தலைவர் மற்றும் ஒன்றிய செயலாளரால் திடீர் பதட்டம் பரபரப்பு ஏற்பட்டது. காட்பாடி ஒன்றியக் குழு பெருந்தலைவராக இருப்பவர் வள்ளிமலை கிராமத்தைச் சார்ந்த வேல்முருகன். இவர் ஒரு நடமாடும் நகைக்கடல் ஆவார். காட்பாடி தெற்கு ஒன்றிய செயலாளராக இருப்பவர் கருணாகரன். இந்நிலையில் ஜனவரி 12ம் தேதியன்று மாலை அமைச்சரை பார்ப்பதற்காக கட்சிக்காரர்கள் அமைச்சர் இல்லத்தின் முன்பு குவிந்திருந்தனர். கடந்த டிசம்பர் மாதம் 20ஆம் தேதிக்கு முன்பு வேலூர் வந்து சென்ற அமைச்சர் பல்வேறு அரசு பணிகளின் காரணமாகவும் அதை தொடர்ந்து நடைபெற்ற தமிழ்நாடு சட்டப்பேரவைக் கூட்டத் தொடரின் காரணமாகவும் காட்பாடி இல்லத்திற்கு வருகை தராமல் இருந்தார். இந்நிலையில் கடந்த 12ம் தேதி வேலூர் வந்திருந்த அவரை காண்பதற்காக கட்சிக்காரர்கள் வீட்டின் முன்பு குவியத் தொடங்கினர்.

அந்த சூழ்நிலையில் அமைச்சரின் வீட்டின் முன் திடீரென்று வேல்முருகன் மற்றும் கருணாகரன் ஒருவரை ஒருவர் சட்டையைப் பிடித்து இழுத்து கொடூரமாக ஒருவரையொருவர் தாக்கிக் கொண்டனர். அப்பொழுது கருணாகரன் வேல்முருகனை பார்த்து என்னை அடிக்கிறாயா! என்ன அடித்து கொன்று விடுவாயா! அடித்து புதைத்து விடுவாயா. என்னிடம் எதுவும் நடக்காது. அதை பெங்களூருவில் வைத்துக்கொள் என்று தாறுமாறாக பேசினார். இந்நிலையில் அங்கு கூடியிருந்த கட்சிக்காரர்கள் அவர்களை விலக்கி சமாதானப்படுத்தி அப்புறப்படுத்தி அழைத்துச் சென்றனர். அமைச்சர் வீட்டுக்கு உள்ளே அழைத்துச் சென்று அமரவைத்த பின்பும் கருணாகரன் வேல்முருகனை பார்த்து பேசிக்கொண்டே இருந்தார்.

வேல்முருகனிடம் கருணாகரன் கடந்த உள்ளாட்சி தேர்தலின் போது ஒரு கோடி ரூபாய் கடன் பெற்றிருந்ததாக  கூறப்படுகிறது. அதில் சுமார் ரூ.70 லட்சம் வரை திருப்பிக் கொடுத்து விட்டதாகவும் மீதியுள்ள ரூ. 30 லட்சத்தை கேட்ட போது வேல்முருகனை பார்த்து உன்னால் என்ன செய்ய முடியுமோ செய்து கொள் என்று கருணாகரன் தாறுமாறாக பேசியதால் இருவருக்கும் இடையில் ஏற்கனவே மோதல் நடந்ததாக கூறப்படுகிறது.

இது சம்பந்தமாக அமைச்சர் இருவரையும் அழைத்து எச்சரித்து அனுப்பியதாகவும் கூறப்படுகிறது.

காட்பாடி வட்டம், வள்ளிமலையைச் சேர்ந்த வேல்முருகன் பெங்களூருவில் ஆயில் பிசினஸ் பார்த்துக் கொண்டிருந்தார். கட்சிப் பணியில் எந்த தொடர்பும் இல்லாத அவரை நேரடியாக வேலூர் எம்பி கதிர்ஆனந்த் அழைத்து அவருக்கு உள்ளாட்சித் தேர்தலில் வாய்ப்பு கொடுத்து  ஒன்றியக் குழு பெருந்தலைவராகவும் ஆக்கிவிட்டார் என்ற அதிருப்தியும் கட்சிக்காரர்களிடம் இருந்து வருவதாக கூறப்படுகிறது. மேலும் கருணாகரன் மீதும் உள்ளாட்சி பிரமுகராக இருந்தபோது ஏரியில் வண்டல் மண் எடுப்பதில் பல கோடி ரூபாய் கொள்ளை அடித்ததாகவும் கட்சிக்காரர்களை எந்த வகையிலும் கவனிக்கவில்லை என்ற குற்றசாட்டும் கூறப்படுகிறது. மேலும் வேல்முருகனின் அடாவடித்தனம், கட்சிக்காரர்களை மதிக்காதது, மூத்தவர்களிடம் சரிவர நடந்து கொள்வதில்லை என்கின்ற குற்றச்சாட்டுகள் தொடர்ந்து இருந்து வந்ததாகவும் கூறப்படுகிறது. 

மேலும் கட்சிக்காரர்கள் அவரைப் பற்றி  நீ ஒன்றும் கழகத்தில் முளைத்த செடி அல்ல பிடுங்கி நட்ட மரம் என்று ஒரு கருத்தையும் பேசி வருவதாக கூறப்படுகிறது.

இந்த பிரச்சனை இப்படி இருக்க 12ம் தேதி அமைச்சரை பார்த்து புத்தாண்டு மற்றும் பொங்கல் வாழ்த்து தெரிவித்துக் கொள்வதற்காக வந்திருந்தவர்கள் முன்னிலையில்  இவர்கள் இருவரும் மோதிக் கொண்ட விஷயம் முகச்சுளிப்பையும் அதிருத்தியையும் ஏற்படுத்தியுள்ளது. இதில் திமுக எவ்வித ஒழுங்கு நடவடிக்கையும் வேல்முருகன் மீது எடுக்காமல் அவருக்கு பதவி கொடுத்து அழகு பார்த்து வருகிறது என்பது குறிப்பிடத்தக்கது. திமுக தலைவரும் தமிழ்நாடு முதலமைச்சருமான மு.க.ஸ்டாலின் வேலூர் மாவட்ட திமுகவினர் மீது சாட்டையை சுழற்றுவாரா? என்பதை பொறுத்திருந்து பார்ப்போம்.